لاہور: (نیوز ڈیسک) طویل انتظار کے بعد آخر کار لاہور کے شہریوں کے لیے خوشی کی خبر آ گئی ہے۔ ڈپٹی کمشنر لاہور سید موسیٰ رضا نے بسنت 2026 منانے کے حوالے سے باقاعدہ نوٹیفکیشن جاری کر دیا ہے۔ انتظامیہ نے سخت حفاظتی اقدامات کے ساتھ مشروط طور پر پتنگ بازی کی اجازت دی ہے۔
اہم تفصیلات: حکومتی اعلان کے مطابق لاہور میں بسنت کا تہوار 6، 7 اور 8 فروری 2026 کو منایا جائے گا۔ پنجاب حکومت نے شہریوں کی حفاظت کو یقینی بنانے کے لیے کچھ سخت شرائط عائد کی ہیں۔
-
پتنگ سازوں کی رجسٹریشن: پتنگ اور ڈور بنانے والوں کے لیے آن لائن رجسٹریشن لازمی قرار دی گئی ہے۔
-
خرید و فروخت کا وقت: پتنگ بازی کے سامان کی فروخت کی اجازت یکم فروری سے 8 فروری 2026 تک ہوگی۔
-
چرخی پر پابندی: پلاسٹک یا دھات کی ڈور اور چرخیوں کی تیاری اور فروخت پر مکمل پابندی ہوگی۔ صرف “پنا” کی شکل میں ڈور کی اجازت ہوگی۔
-
موٹر سائیکل سواروں کے لیے حفاظتی وائر: حادثات سے بچاؤ کے لیے موٹر سائیکل پر سیفٹی وائر لگانا لازمی قرار دیا گیا ہے۔
ڈپٹی کمشنر نے واضح کیا ہے کہ دھاتی یا کیمیکل ڈور استعمال کرنے والوں کے خلاف سخت کارروائی کی جائے گی۔ انہوں نے کہا کہ بسنت لاہور کا ثقافتی تہوار ہے اور اسے محفوظ بنانا ہم سب کی مشترکہ ذمہ داری ہے۔
رجسٹرڈ کاروباری حضرات 30 دسمبر سے قانونی طور پر اپنا کام شروع کر سکتے ہیں، لیکن خلاف ورزی کرنے والوں کے خلاف پولیس کریک ڈاؤن کرے گی۔